為我細漢時的台語囡仔歌揣出正確的漢字（含錄音檔）

細漢的時大約是5,60冬前的代誌了，蹛佇嘉義的庄跤，彼時的囡仔歌或童謠攏是綴人唸，無歌詞留落來，這馬想起來，差不多袂記了了。網路頂去搜揣，往往是一大堆無仝款的版本，總是無法度重溫著囡仔時代的滋味。本部落格的目的就是欲趁家己這馬台語有一點仔基礎，參考著網路頂的資料，共家己的淡薄仔記持加入去，閣加入聲音了後，予細漢時的印象閣再活起來。盼望這馬或是後來的囡仔有機會透過正確的漢字，去體會阿公阿祖彼沿的囡仔生活。